Mat 16 | WSK | STEP | Se Pharisee alo se Sadducee alo Jesus ira aringimonko se kote taiman ale iwita nu manorman, “Ni duruk te ko kilek bo bitar se ana aringinakko,” maman.

Matthew 16

Pharisee se Sadducee kari Jesus kilek bo bitiruk se aringimonko isarman

(Mark 8:11-13; Luke 12:54-56)

1 Se Pharisee alo se Sadducee alo Jesus ira aringimonko se kote taiman ale iwita nu manorman, “Ni duruk te ko kilek bo bitar se ana aringinakko,” maman.

2 Bare nu nunga den koma iwita balam, “Baingoso se taiti nuwi diriyam aratoso mu nina balsan, ‘Mu tom yawarakala aratukkowo,’ ma balsan. 3 Se aking tumong biyala nina barasasan ale taiti nuwi diriyam tiromorom karogo arigisan, mu nina te sinar woresan ale balsan, ‘Mu tuwik daula karogo tairukkowo,’ ma balsan. Taiti aguwaya arigisan mu nina balsan tom memek agi tom ningo aratukko masan.

“Bare aitak tom imi te kilek kilek aratoso mu nina te ikial ale sinar ago bagaralko, bare nina kilek mu ko me sinar woresan. 4 Nina tom imi ko kariimet, nina kariimet memek, nengemang ningi nunguning mena, se duruk te ko kilek biya bo arigalko isa lagasan! Bare ani bo bitirik se me arigalko! Kilek Jonah kumik te aratam wore la te ikialko!” Jesus butata balam ale eng nunga beteram namaram.

Jesus olekem alo Pharisee se Sadducee nunga yeast ko sinar tamonko balam

(Mark 8:14-21)

5 Jesus ko olekem alo arungu yu batoga komasang te namaman, bare olekem alo bread gimonko nungamili saparam. 6 Se Jesus nunga maonam, “Sinar talko! Pharisee alo se Sadducee alo nunga yeast ninga ningi aniruk bore ko sinar ago bagaralko!”

7 Se olekem alo nongota den mu ko balu gurugukasan ale makasan, “Ana bread me giman wore ko nu uwutata balso agila pa?” maman.

8 Se nuna den baluwakasan mu Jesus maingkala ko ikiam, ale ko iwita nunga maonam, “Nina anape ko bread me giman mu ko den tagi gurugumu lagasan a? Mu nina ninga nengemang ningi nunguning mu katirta!

9 “Se nina me ko ikisan, am nguala lagasan e? Ani bread 5 pakakerem se kari 5000 naman se na nukum wogaram se korokem 12 tuguman mu ko ikia nengete me aniso agila? 10 Se aking bread 7 pakakerem se kari 4000 naman se ko na nukum wogaram se korokem 7 tuguman mu ko ikia betelatala nengete me aniso e? 11 Se awuk se nina aninga den ko nunguning me ikiman? Ani bread ko me balukasam. Ani iwita ko ninga manem, mu nina Pharisee se Sadducee nunga yeast ko ninimi ko ninguru sinar talko maem!”

12 Se umutang te ko olekem alo ikiman, mu nu bread ko yeast ko nunumi ko sinar tamonko me balam, bare Pharisee se Sadducee nunga den ko nunumi ko sinar tamonko ko balam. ^{▼▼Mat 16:12 Pharisee nunga kawel kilek: Luke 12:1; Mat 23:1-33.}

Peter wetang te balam Jesus mu Kristus mam

(Mark 8:27-30; Luke 9:18-21)

13 Jesus wonong biya Caesarea Philippi mu duap te tai aratam mu nu ko olekem alo nunga isuam, “Kariimet pa Kari ko Kuriang wore awiri ko iwita balsan a?”

14 Se nuna balman, “Saki Anuwa Kari John ma balsan, se saki Elijah, se saki Jeremiah agi prophet bo ko iwita balsan.”

15 Se Jesus nunga isuam, “Bare nina nengeta mu ani awiri ko iwita aga balsan?”

16 Se Simon-Peter nu maonam, “Ni mu ni Kristus, ni Kaem marak bagoso ko Namar.”

17 Se Jesus nu maonam, “Simon, Jonah ko kuriang,” mam, “ni amilmilerko! Mu awuk, aliti ko kari bo ikia imi ni me ka kausam. Mu aninga Ait duruk te bagoso wore ikia imi ka kausam. 18 Se ani iwita ka manorsam, ni Peter, se manga umutang te aninga kawam kalikko. ^{▼▼Mat 16:18 Jesus kawam te balam mu nu Kris kariimet nunga balso. Kawam kaola ko den saki: 1 Cor 3:11; Eph 2:20; 1 Peter 2:4-6; Rev 21:14.} Se Satan kawam mu me parasuwurok menawurokko, kawam mu tom suen biya anirukko. 19 Ani duruk wonong ko kingdom ko key kisekko. Se ni ali imi te anapeya ko ko lage kalosam, mu duruk wonong te agotala ko lage kalokko. Se ni ali imi te anapeya ko lage kuring kagaru, mu duruk wonong te agotala kagukko.” ^{▼▼Mat 16:19 Jesus ko kariimet sokel nungaram: Mat 18:19-20; John 20:23.} 20 Jesus buta balam, asele den aora biya ko olekem alo nunga maonam, nuna nu Kristus bare kari bo ta me manarmonko mam.

Jesus kueruk ale aking barasukko den balam

(Mark 8:31-33; Luke 9:22-23)

21 Se tom mu te Jesus mel nu kumik te aratukko mu ko olekem alo nunga maona duap beteram ale nunga manarukaso. Nu balam, “Ani Jerusalem namirik, se mu te kari supuling alo, priest bibiya, se Law Den ko kausa kari ani yaman ikup suen biya aisimon se giekko. Nuna aga momon se kuerik, ale tom ilagala suwan mu te aking barasikko.”

22 Se Peter Jesus tam ilak due ko namaram ale ining tuikaso. “Kari Biya,” makaso, “kilek sumu ni kimik te aratukko ani me ko kuesam!”

23 Se Jesus punga geragam ale Peter maonam, “Satan, ni tagi toko! Ni aninga lage bagusam. Nika ikia balsam sumu mu Kaem ko ikia te mena, mu kari ko ikia te aninga manorsam.”

Jesus kowom kaora ko den balam

(Mark 8:34-9:1; Luke 9:24-27)

24 Asele Jesus ko olekem alo aking nunga maonam, “Kari awiriya ani agowom karukko mu nu kota ko ikia, ko gomang mu buring tuok, ale kota ko tam kangono giok ale ani agowom karukko. 25 Mu awuk, kari awiriya kuerukko nguanguruk ale ani agowom me karuk, mu nu Kaem ko marak yawara tom suen biya te bagurukko mu me taukko. Bare kari awiriya kuerukko me nguanguruk, am ani agowom karuk, mu kari mu Kaem ko marak yawara tom suen biya te bagurukko mu taukko.

26 “Kari bo ali imi te mel suen biya giam, bare mel suwanta nu Kaem ko marak yawara me tam ale kueram, mu mel gi lagaram mu awuk ta nu sanguk i? Mena.

Awuk ta nu marak ningo yawara te bagara ko mu arigok i? Mena.

/ Nu anape mel te marak ningo yawara te bagara ko mu tauk i? Mena. 27 Mu awuk, Kari ko Kuriang mu ko Nuet ko nikinang biya mu karogo se engel alo arungu tairuk ale kariimet suwan suwan nunga bagara aolak te nunga tuteruk ale ko koma nungarukko. ^{▼▼Mat 16:27 Jesus anananga bagara aolak te nanga tuterukko: Rom 2:6; 1 John 2:28; Rev 22:12.} Se ani nunguningta ninga manorsam, kariimet sang imi te sanamiwasan mu saki me kuemon baga Kari ko Kuriang king iwita tairuk se aringimonko.”

28